Heilsuvernd skólabarna í  Stóru-Vogaskóla er á vegum Heilbrigðisstofnunar Suðurnesja.

Hjúkrunarfræðingur er Nanna Jónasdóttir.

Hjúkrunarfræðingur er í húsi frá kl. 10-14 á mánudögum og kl 10-12 á þriðjudögum. Alltaf er hægt að senda hjúkrunarfræðing tölvupóst á netfangið storuvogaskoli@hss.is, einnig er hægt að senda skilaboð á Mentor eða hringja í Stóru-Vogaskóla og óska eftir símtali.

Opnir viðtalstímar hjúkrunarfræðings:

• Mánudaga kl.10-12
• Þriðjudaga kl. 10-12

 

Neyðar-/hjálparsímanúmerið er 1700 og 1717.

Í neyðartilvikum skal hringja í 112.

Heilsuvernd skólabarna er hluti af heilsugæslunni og framhald af ung- og smábarnavernd. Markmiðið er að efla heilbrigði nemenda og stuðla að vellíðan þeirra.

Starfsfólk heilsuverndar skólabarna vinnur í náinni samvinnu við foreldra, skólastjórnendur, kennara og aðra sem koma að málefnum nemenda með velferð þeirra að leiðarljósi. Farið er með allar upplýsingar sem trúnaðarmál. Þjónusta heilsuverndar skólabarna er skráð í rafræna sjúkraskrá heilsugæslunnar.

Helstu áherslur í heilsuvernd skólabarna eru forvarnir, fræðsla, skimanir og bólusetningar.

Unnið er samkvæmt leiðbeiningum Þróunarmiðstöðvar íslenskrar heilsugæslu og Embættis landlæknis um heilsuvernd grunnskólabarna. Hægt að skoða upplýsingar um það á þessari slóð: Heilsuvernd skólabarna (throunarmidstod.is).

Heilbrigðisfræðsla: Skipulögð heilbrigðisfræðsla er veitt í öllum árgöngum og er áherslan á að hvetja til heilbrigðra lífshátta. Eftir fræðslu fá foreldrar upplýsingar í tölvupósti um fræðsluna. Þá gefst þeim kostur á að ræða við börnin um það sem þau lærðu og hvernig hægt er að nýta það í daglegu lífi.

Markmið hverrar fræðslu eftir árgöngum er hægt að sjá á Heilsuvera.is

Skimanir

Skimað er fyrir ákveðnum heilbrigðisvandamálum og eru skimanir framkvæmdar í 1., 4., 7. og 9. bekk. Þær felast í mælingu á hæð, þyngd og sjónskerpu. Nemendur í öðrum árgöngum eru skimaðir eftir þörfum. Ef frávik reynist í skimun er ávallt haft samband við forráðamann. Ef ástæða þykir til vísar hjúkrunarfræðingur nemanda til læknis og einnig er þeim boðið í heilsueflandi móttöku barna.

Heilsueflandi viðtöl um lífsvenjur og líðan

Þegar skimanir fara fram í 1., 4., 7. og 9. bekk ræðir hjúkrunarfræðingur við nemendur um líðan og lífsvenjur. Markmið viðtalanna er að styrkja vitund nemenda um eigið heilbrigði og líðan. Einnig að geta gripið til úrræða ef vart verður við vanlíðan eða áhyggjur.

Bólusetningar

Bólusetningum er ætlað að verja einstaklinginn gegn alvarlegum smitsjúkdómum. Í 7. bekk er bólusett við mislingum, hettusótt og rauðum hundum (ein sprauta), og HPV (Human papilloma veirum) sem geta valdið leghálskrabbameini. HPV bólusetning er gefin tvisvar með 6 mánaða millibili.

Í 9. bekk er bólusett við barnaveiki, stífkrampa, kíghósta og mænusótt (ein sprauta).

Áður en kemur að bólusetningu er sendur tölvupóstur til foreldra með upplýsingum um tímasetningu.

Nemendur í öðrum árgöngum eru skoðaðir ef þörf er á.

Hafið samband við hjúkrunarfræðing ef:

• Nánari upplýsinga er óskað.
• Talið er að barn sé ekki að fullu bólusett.
• Óskað er eftir því að barn sé ekki bólusett.

Það er á ábyrgð foreldra að láta bólusetja börn sín.

Hagnýtar upplýsinga

Veikindi og slys

Ef óhapp eða slys verður á skólatíma sér starfsfólk skólans um fyrstu hjálp. Þurfi nemandi að fara á heilsugæsluna eða slysadeild skulu foreldrar fara með barninu. Því er mikilvægt að skólinn hafi öll símanúmer þar sem hægt er að ná í þá á skólatíma barnsins. Ekki er ætlast til að óhöppum sem gerast utan skólatíma sé sinnt af heilsuvernd skólabarna.

Langveik börn

Mikilvægt er að hjúkrunarfræðingur viti af börnum sem eru með fötlun eða langvinnan og/eða alvarlegan sjúkdóm, s.s. sykursýki, ofnæmi, flogaveiki, blæðingarsjúkdóma eða aðra alvarlega sjúkdóma. Hlutverk hjúkrunarfræðingsins er að skapa þessum börnum viðeigandi aðstæður og umönnun í skólanum í samvinnu við foreldra og starfsfólk skólans.

Lyfjagjafir

Samkvæmt tilmælum landlæknis um lyfjagjafir í grunnskólum eru sérstakar vinnureglur varðandi lyfjagjafir til nemenda á skólatíma. Þar kemur meðal annars fram að skólabörn skulu ekki fá önnur lyf í skólanum en þau sem hafa verið ávísuð af lækni. Í engum tilvikum getur barn borið ábyrgð á lyfjatökunni. Ábyrgð er foreldranna. Börn skulu ekki hafa nein lyf undir höndum nema í algjörum undantekningartilvikum. Slíkar lyfjagjafir eru t.d. insúlíngjafir sem barnið sér sjálft alfarið um. 

Tannvernd

Mikilvægt að allir nemendur séu skráðir með heimilistannlækni og hefur hjúkrunarfræðingur samband ef svo er ekki. Einnig eru tennur skoðaðar hjá nemendum.

Höfuðlús og Njálgur

Höfuðlús birtist reglulega í skólum landsins og er mikilvægt að foreldrar kembi hár barna sinna reglulega yfir skólaárið. Rétt er að láta skólann vita ef lús finnst í hári barns og hjúkrunarfræðingur getur leiðbeint varðandi lúsasmit. Með Njálg gilda sömu reglur og mikilvægt að hafa samband ef smit greinist og meðhöndla strax.